 |
| آخر نصيحة لطلاب الصف الثالث الثانوي 2024 قبل دخول امتحانات الثانوية العامة ! |
بص يا سيدي انت ذاكرت وتعبت علي مدار سنة دراسية كاملة فيه اللي عمل اللي عليه علي اكمل وجه وفيه اللي كان بيجتهد بقدر الإمكان وفيه اللي كان مقصر وفيه اللي كان ضايع، كله بنسب متفاوتة عشان كده عايزك تفكك من ده كله وتركز في أهم تفاصيل ممكن تقابلك فترة الامتحانات
- أول حاجه أيام الإمتحانات هتفوت تجري زي الصاروخ فـ حاول تكون منظم وقتك كويس ومحدد هتعمل ايه امتي عشان متلاقيش الوقت جري وملحقتش تراجع المادة!
- وانت بتراجع المراجعة النهائية هتلاقي نفسك ناسي حاجات ومتوتر جداً وما الي ذلك… ده طبيعي جداً فـ خليك هادي وراجع بهدوء وانت هتفتكر كل حاجه بسهولة إن شاء الله .
- قبل الإمتحان حاول لو فيه وقت تقرأ سورة يس فيها بركة كبيرة إن شاء الله وبلاش تراجع وانت في الطريق للإمتحان ومتاخدش معاك مذكرات ولا اي إوراق وسد ودنك وعينك عن أي حد من أصحابك أو مش من أصحابك بيراجعوا عشان متحسش انك تايه.
- في الإمتحان برودك وثقتك في نفسك هو اللي هيساعدك تحل كويس، فكك من اللي جنبك واللي قدامك واللي وراك واللي بيغش واللي بيعيط والمراقب اللي بيزعق ومخضر الغش اللي اتعمل واي حوارات تانيه تركيزك في ورقتك ولما تفقد تركيزك استغفر ربنا كتير وخد ربع دقيقه في هدوء وهتلاقي نفسك استرجعت تركيزك تاني .
- اياك ثم اياك ثم اياك تفكر تغش، مهما كانت الظروف ومهما كانت الاسباب اوعي تفكر تغش، الغش لحظة ممكن تكسب بيها سؤال بس هتخسر بيها حاجات كتير جدا بعد ربنا وحده أعلم بيها، ف بلاش تجازف في حاجه بلا ادني شك خسرانة
- بعد الامتحان اوعي تراجع، لو انطبقت السماء علي الأرض اوعي تراجع، لو اصحابك بيراجعو ابعد عنهم، لو ماشي جنب ناس بتراجع سد ودنك، صدقني مش هيكون فيه اتعس من انك تعرف انك حالل سؤال غلط وازاي ده ممكن يأثر علي المادة اللي بعدها عشان كده اكسب نفسك من الاول واوعي تفكر تراجع.
- بعد الامتحان احمد ربنا ايا كان الحل وبعد كده انسي المادةدي وافتح صفحة جديدة للمادة الجديدة .
- دايما في حياتي كنت بسمع ناس تقول التصحيح محدش يقدر يتوقعه وان بيحصل فيه عكس مانت متخيل ومصدقتش الكلام ده غير لما شفت بنفسي، بعد مادة من المواد طلعت قلت هندسة راحت وش وكنت فقدت جزء كبير من الأمل الا ان كان عندي حسن ظن بالله وبعدها جبت اعلي من مجموع هندسة باكتر من ٢% … انت متخيل من واحد مش هيجيب هندسة لا جايب هندسة مع مرتبة الشرف .
- فبلاش تحسب درجات لان حساباتك قطعا هتكون غلط، انت اعمل اللي عليك وسيب الباقي علي ربنا.
- الثانوية مش اخر الحياة بل دي مجرد جزء ليس الاهم في حياتك ف بلاش يكون مسألة حياة او موت بالنسبة لك حاول تديها حجمها لا اكثر ولا اقل، خلي ثقتك في ربنا كبيرة جدا حتي لو كنت متعرفش حاجه ف المنهج لان ربنا رحمته وسعت كل شئ ولو كسبت ربنا في صفك يبقي انت كسبت كل حاجه
- “وأن ليس للإنسان إلا ما سعى وأن سعيه سوف يُري”
من نصائح ” غرناطة أكاديمي ”